ഏഷ്യൻ ക്രിക്കറ്റ് കൗൺസിലിന്റെ(ഏസിസി) നിർണായകയോഗം അടുത്തയാഴ്ച നടക്കും. ഫെബ്രുവരി നാലിന് ബഹ്റൈനിൽ നടക്കുന്ന ഈ യോഗത്തിൽ ഏഷ്യാ കപ്പിന്റെ ആതിഥേയത്വം സംബന്ധിച്ച് തീരുമാനമുണ്ടായേക്കും. ക്രിക്ക്ബസാണ് ഇക്കാര്യം റിപ്പോർട്ട് ചെയ്തിരിക്കുന്നത്.
ഈ വർഷം ഓഗസ്റ്റ്-സെപ്റ്റംബർ മാസങ്ങളിലാണ് ഏഷ്യാ കപ്പ് നിശ്ചയിച്ചിരിക്കുന്നത്. ഏകദിന ഫോർമാറ്റിൽ നടക്കുന്ന ടൂർണമെന്റിന്റെ ആതിഥേയത്വം യഥാർഥർത്തിൽ പാകിസ്ഥാനാണ് ലഭിച്ചത്. എന്നാൽ ഇതിനിടയിലാണ് രാഷ്‌ട്രീയ കാരണങ്ങളുടെ പശ്ചാത്തലത്തിൽ ഇന്ത്യൻ ടീമിനെ പാകിസ്ഥാനിലേക്ക് അയക്കില്ല എന്ന് ബിസിസിഐ പ്രഖ്യാപിച്ചത്. ടൂർണമെന്റിന്റെ വേദി പാകിസ്ഥാനിൽ നിന്ന് മാറ്റണമെന്നാണ് ബിസിസിഐ ആവശ്യപ്പെടുന്നത്.
ഏഷ്യാ കപ്പ് പാകിസ്ഥാനിൽ നിന്ന് മാറ്റിയാൽ വർഷാവസാനം ഇന്ത്യയിൽ നടക്കാനിരിക്കുന്ന ഏകദിന ലോകകപ്പിൽ നിന്ന് പിന്മാറുമെന്ന് പാകിസ്ഥാൻ ക്രിക്കറ്റ് ബോർഡ് ചെയർമാനായിരുന്ന റമീസ് രാജ പറഞ്ഞിരുന്നു. റമീസിന് പകരം പാക്ക് ക്രിക്കറ്റ് അധ്യക്ഷനായി നജാം സേഥിയെത്തിയെങ്കിലും ഇക്കാര്യത്തിൽ നിലപാട് ഏതാണ്ട് ഒരുപോലെ തന്നെയാണ്. എന്നാൽ മറ്റ് ഏഷ്യൻ രാജ്യങ്ങളുടെ കാര്യമായ പിന്തുണയും പാകിസ്ഥാനില്ല. ഈ സാഹചര്യത്തിലാണ് ഏസിസി യോഗം നടക്കാനിരിക്കുന്നത്.
