വിഖ്യാത താരം ക്രിസ്റ്റ്യാനോ റൊണാൾഡോയുടെ ഫുട്ബോൾ ഭാവി എന്താണെന്ന കാര്യത്തിൽ ഇതുവരെ വ്യക്തമായ സൂചനകൾ ഇല്ല. സൗദി അറേബ്യൻ ക്ലബായ അൽ നാസർ റൊണാൾഡോയെ ഒപ്പം കൂട്ടാൻ ശ്രമിക്കുകയാണെന്ന വാർത്തകൾ വളരെ സജീവമാണ്. റൊണാൾഡോയും ഈ നീക്കത്തിന് പച്ചക്കൊടി കാട്ടിയതായി അഭ്യൂഹങ്ങളുണ്ടെങ്കിലും ഒന്നിനും വ്യക്തമാ സ്ഥിരീകരണമില്ല.
സ്പാനിഷ് മാധ്യമമായ മാർക്കയുടെ റിപ്പോർട്ട് അനുസരിച്ച് റൊണാൾഡോയുടെ സൈനിങ് അൽ നാസർ വൈകാതെ ഔദ്യോഗികമായി സ്ഥിരീകരിക്കും. എന്നാൽ അതേസമയം തന്നെ റൊണാൾഡോയ്ക്ക് പുറമെ മറ്റൊരു സൂപ്പർതാരത്തെ കൂടി റാഞ്ചാൻ ക്ലബിന് പദ്ധതിയുണ്ടെന്നും ഇവർ റിപ്പോർട്ട് ചെയ്യുന്നുണ്ട്.
സ്പാനിഷ് സൂപ്പർതാരവും മുൻ ക്യാപ്റ്റനുമായി സെർജിയോ റാമോസിനെയാണ് അൽ നാസർ ഉന്നമിടുന്നത്. നിലവിൽ ഫ്രഞ്ച് സൂപ്പർക്ലബ് പിഎസ്ജിക്ക് വേണ്ടിയാണ് ഈ താരം കളിക്കുന്നത്. ഈ സീസണൊടുവിൽ പിഎസ്ജിയുമായി കരാർ അവസാനിക്കുന്നതോടെ ഈ സെന്റർ ബാക്കിനെ റാഞ്ചാനാണ് അൽ നാസർ പദ്ധതിയിടുന്നത്. അൽ നാസർ പ്രസിഡന്റും സ്പോർട്ടിങ് ഡയറക്ടറും റാമോസിനെ നേരിൽ കാണാനും ഓഫർ മുന്നോട്ടുവയ്ക്കാനുമായി പാരീസിലേക്ക് പറക്കുമെന്ന് സൗദി അറേബ്യൻ മാധ്യമങ്ങൾ പറയുന്നതായും മാർക്ക റിപ്പോർട്ട് ചെയ്തു. അതേസമയം ഈ നീക്കം യാഥാർഥ്യമായാൽ റാമോസും റൊണാൾഡോയും ഒന്നിച്ചുകളിക്കുന്നത് കാണാൻ ഒരിക്കൽ കൂടി ആരധകർക്ക് അവസരം ലഭിക്കും.
