SHARE

ഐഎസ്എൽ ക്ലബ് ബെം​ഗളുരു എഫ്സിയുടെ ആരാധകർക്ക് ആവേശം പകർന്ന് സ്റ്റാർ പരിശീലകൻ ആൽബർട്ട് റോക്ക തിരിച്ചെത്തുന്നു. ക്ലബിന്റെ ടെക്നിക്കൽ ഡയറക്ടറായാണ് റോക്കയുടെ തിരിച്ചുവരവ്. ഖേൽനൗവാണ് ഇക്കാര്യം റിപ്പോർട്ട് ചെയ്തിരിക്കുന്നത്.

ഇക്കുറി ഐഎസ്എല്ലിൽ നിരാശപ്പെടുത്തുന്ന പ്രകടനമാണ് ബെം​ഗളുരു നടത്തിയത്. എന്നാൽ കഴിഞ്ഞ കുറച്ച് മത്സരങ്ങളിൽ തുടർജയങ്ങൾ നേടി അവർ പ്ലേ ഓഫ് പ്രതീക്ഷകൾ സജീവമാക്കിയിട്ടുണ്ട്. എങ്കിലും അടുത്ത സീസണിൽ വൻ അഴിച്ചുപണി ക്ലബിൽ നടക്കുമെന്നാണ് സൂചന. ഇതിന്റെ ഭാ​ഗമായി ഹ്രസ്വകാല കരാറിലാണ് ടെക്നിക്കൽ ഡയറക്ടർ റോളിൽ വരവെന്നാണ് റിപ്പോർട്ടുകൾ. റോക്കയുടെ ടെക്നിക്കൽ ടീമിൽ മുൻ സൂപ്പർ താരം ഡാരൻ കാൾഡെയ്റയും ഇടം പിടിക്കുമെന്നാണ് റിപ്പോർട്ട്.

ബെം​ഗളുരുവിന്റെ മുൻ പരിശീലകനെന്ന നിലയിൽ വലിയ ശ്രദ്ധ നേടിയിരുന്നു റോക്ക മുമ്പ്. 60-കാരന റോക്കയുടെ കീഴിൽ ബെം​ഗളുരു ഏഎഫ്സി കപ്പിന്റെ ഫൈനൽ വരെയെത്തി ചരിത്രമെഴുതിയിരുന്നു. ഐഎസ്എല്ലിലും ഫൈനലിലെത്തിയ അവർ ഫേഡറേഷൻ കപ്പും റോക്കയ്ക്ക് കീഴിൽ നേടി. പിന്നീട് ഹൈദരബാദ് എഫ്സി പരിശീലകനായി കുറച്ചുനാൾ പ്രവർത്തിച്ച റോക്ക, അതുവിട്ട് സ്പാനിഷ് സൂപ്പർ ക്ലബ് ബാഴ്സലോണയുടെ പരിശീലസംഘത്തിന്റെ ഭാ​ഗമായിരുന്നു.