SHARE

കേരള ബ്ലാസ്റ്റേഴ്‌സിനായി രണ്ടു സീസണുകളില്‍ കളിച്ച താരമാണ് അന്റോണിയോ ജെര്‍മെയ്ന്‍. ബ്ലാസ്‌റ്റേഴ്‌സ് വിട്ടുപോയിട്ടും കേരളത്തിലെ ആരാധകരുമായി തുടര്‍ച്ചയായി സോഷ്യല്‍മീഡിയയിലുടെ സംവദിച്ച ജെര്‍മെയ്ന്‍ വീണ്ടും മലയാളക്കരയിലേക്ക് എത്തുകയാണ്. അടുത്ത ഐലീഗ് സീസണില്‍ ഗോകുലം കേരള എഫ്‌സിക്കായി പന്തുതട്ടാനൊരുങ്ങുന്ന ജെര്‍മെയ്ന്‍ താന്‍ എന്തുകൊണ്ട് ഈ ടീമിനൊപ്പം ചേര്‍ന്നെന്ന കാര്യം വ്യക്തമാക്കുകയാണ്.

ബ്ലാസ്റ്റേഴ്‌സില്‍ നിന്ന് പോയശേഷം മറ്റൊരു ക്ലബിനായി കളിക്കേണ്ടി വന്നത് വലിയ വേദനയായിരുന്നു. കാരണം ഈ ടീമിനെയും ആരാധകരെയും അത്രമേല്‍ സ്‌നേഹിച്ചിരുന്നു. ഇപ്പോള്‍ ഇന്ത്യയിലേക്ക് തിരിച്ചെത്താന്‍ സാധിച്ചതില്‍ വലിയ സന്തോഷം. ബ്ലാസ്‌റ്റേഴ്‌സിലേക്ക് അല്ല തിരിച്ചുവരുന്നതെങ്കിലും ഗോകുലത്തിനായി കളിക്കുന്നതില്‍ നിറഞ്ഞ സന്തോഷമാണ്- ജെര്‍മെയ്ന്‍ പറയുന്നു.

ഗോകുലത്തെ അടുത്ത സീസണില്‍ ഐലീഗ് ചാമ്പ്യന്മാരാക്കുന്നതാണ് തന്റെ പ്രധാന ദൗത്യമെന്ന് ഇംഗ്ലീഷ് സ്‌ട്രൈക്കര്‍ പറയുന്നു. ലീഗില്‍ എനിക്ക് ടോപ് സ്‌കോറര്‍ ആകണം. ഒപ്പം ടീമിനെ കിരീടത്തിലേക്ക് നയിക്കുകയും വേണം. പുതിയ വെല്ലുവിളിയെ നിറഞ്ഞ മനസോടെ സ്വീകരിക്കുകയാണെന്നും ജെര്‍മെയ്ന്‍ പറയുന്നു. ഗോകുലത്തിന്റെ പ്രീസീസണ്‍ ക്യാമ്പ് ജൂണ്‍ അവസാനം തുടങ്ങുമെന്നാണ് സൂചന.