ഐ- ലീഗിൽ റയൽ കശ്മീരിനെതിരെ മോഹൻ ബഗാന് ജയം. എതിരില്ലാത്ത രണ്ട് ഗോളിനാണ് ബഗാന്റെ ജയം. വിജയത്തോടെ ഐ- ലീഗ് പോയിന്റ് പട്ടികയിൽ ബഗാൻ ഒന്നാമതെത്തി.
കശ്മീരിന്റെ മൈതാനത്ത് നടന്ന മത്സരത്തിൽ ആദ്യ പകുതി ഗോൾരഹിതമായിരുന്നു. തുടർന്ന് രണ്ടാം പകുതിയിൽ അടുത്തടുത്ത മിനിറ്റുകളിൽ നേടിയ രണ്ട് ഗോളുകളാണ് ബഗാനെ വിജയത്തിലെത്തിച്ചത്. 72-ാം മിനിറ്റിൽ സ്പാനിഷ് താരം ജോസെബാ ബെയ്റ്റിയയിലൂടെ ബഗാൻ ലീഡെടുത്തു. തൊട്ടടുത്ത മിനിറ്റിൽ തന്നെ മണിപ്പൂരിൽ നിന്നുള്ള നോങ്ഡമ്പാ നോയ്റെമിന്റെ ഗോളിൽ ബഗാൻ വിജയമുറപ്പിക്കുകയും മൂന്ന് പോയിന്റ് സ്വന്തമാക്കുകയും ചെയ്തു.
ഇന്നത്തെ വിജയത്തോടെ അഞ്ച് മത്സരങ്ങളിൽ നിന്ന് പത്ത് പോയിന്റുമായി ബഗാൻ ലീഗിൽ ഒന്നാം സ്ഥാനത്തെത്തി. ഒരു കളി കുറച്ചു കളിച്ച ചർച്ചിൽ ഒമ്പത് പോയിന്റുമായി രണ്ടാം സ്ഥാനത്തുണ്ട്.
