SHARE

ഇന്ത്യൻ സൂപ്പർ ലീ​ഗിന്റെ അടുത്ത സീസണിൽ ബെം​ഗളുരു എഫ്സിയിൽ വൻ അഴിച്ചുപണിയുണ്ടാകുമെന്നാണ് സൂചന. ഇക്കുറി കഴിഞ്ഞ കുറച്ച് മത്സരങ്ങളിലെ തുടർജയങ്ങളോടെ പ്ലേഓഫ് പ്രതീക്ഷ നിലനിർത്തുകയാണ് ബെം​ഗളുരു. എങ്കിലും അടുത്ത സീസണിൽ വൻ മാറ്റത്തിനാണ് സാധ്യത തെളിയുന്നത്.

ഖേൽനൗവിന്റെ റിപ്പോർട്ട് പ്രകാരം മുൻ പരിശീലകൻ ആൽബർട്ട് റോക്കയെ ബെം​ഗളുരു ടെക്നിക്കൽ ഡയറക്ടറായി നിയമിക്കും. എന്നാൽ ഇതിനുപുറമെ ചില നീക്കങ്ങൾ കൂടി ബെം​ഗളുരുവിന്റെ മനസിലുണ്ട്. ഇതിലൊന്ന് ഹൈദരബാദ് പരിശീലകൻ മോനോലോ മാർക്വെസിനെ റാഞ്ചുകയെന്നതാണ്. ഹൈദരബാദിനൊപ്പമുള്ള മാർക്വെസിന്റെ കരാർ ഈ സീസണിൽ അവസാനിക്കും. ഇതോടെ മാർക്വെസിനെ റാഞ്ചാനാണ് ബെം​ഗളുരുവിന്റെ ശ്രമം. മാർക്വെസുമായുള്ള ബെം​ഗളുരുവിന്റെ ചർച്ചകൾ മുന്നേറിയെന്നും ഇനി പരിശീലകന്റെ ഭാ​ഗത്ത് നിന്ന് പച്ചക്കൊടി കാണിക്കേണ്ട കാര്യമേയുള്ളുവെന്നുമാണ് ഖേൽനൗവിന്റെ റിപ്പോർട്ട്.

ഹൈദരബാദിന്റെ പരിശീലകന് പുറമെ ഇന്ത്യൻ സൂപ്പർതാരം ഹളിചരൻ നാർസരിയേയും ബെം​ഗളുരു നോട്ടമിടുന്നുണ്ട്. ഈ സീസണിൽ ഹൈദരബാദിനായി തകർപ്പൻ പ്രകടനമാണ് ഈ വിങ്ങർ നടത്തുന്നത്. 13 മത്സരങ്ങളിൽ നിന്ന് മൂന്ന് ​ഗോളും അഞ്ച് അസിസ്റ്റും നാർസരി സ്വന്തം പേരിൽ കുറിച്ചു. എന്നാൽ നാർസരി മൂന്ന് വർഷത്തെ കരാറിൽ അടുത്ത സീസണിൽ ബെം​ഗളുരുവിന്റെ ഭാ​ഗമാകുമെന്നാണ് ഖേൽനൗ റിപ്പോർട്ട് ചെയ്യുന്നത്.