ഇന്ത്യൻ സൂപ്പർ ലീഗ് ക്ലബ് ഈസ്റ്റ് ബംഗാളിന്റെ സഹപരിശീലകൻ തോർഹാളർ സിഗുർസൻ ക്ലബ് വിട്ടു. ഈ സീസണിൽ ക്ലബ് ഒപ്പം കൂട്ടിയ പരിശീലകനാണ് ഐസ്‌ലാൻഡിൽ നിന്നുള്ള സിഗുർസൻ. ഇപ്പോൾ ഏഴ് മാസത്തെ സേവനത്തിന് ശേഷം സിഗർസനെ ഈസ്റ്റ് ബംഗാൾ പുറത്താക്കിയിരിക്കുകയാണ്.
ഐഎസ്എല്ലിൽ ഇക്കുറിയും ഈസ്റ്റ് ബംഗാളിന് പ്ലേ ഓഫിലെത്താൻ സാധിച്ചില്ല. ഇതിന്റെ തുടർച്ചയായി വൻ അഴിച്ചുപണി ക്ലബിലുണ്ടാകുമെന്ന സൂചനയാണ് സിഗുർസന്റെ പുറത്താകലിലൂടെ ലഭിച്ചിരിക്കുന്നത്. ക്ലബിന്റെ ഇംഗ്ലീഷ് പരിശീലകൻ സ്റ്റീഫൻ കോൺസ്റ്റന്റൈന്റെ താൽപര്യപ്രകാരമാണ് സിഗുർസനെ കൊണ്ടുവന്നത്. ഇപ്പോൾ സിഗുർസൻ പുറത്തായതോടെ കോൺസ്റ്റന്റൈന്റേയും പണി പോകാനുള്ള സാധ്യത തെളിയുന്നുണ്ടെന്നാണ് സൂചന.
മുമ്പ് പലവട്ടം അടുത്ത സീസൺ കൂടി ലക്ഷ്യമിട്ടാണ് പ്രവർത്തിക്കുന്നതെന്നാണ് കോൺസ്റ്റന്റൈൻ പറഞ്ഞിട്ടുള്ളത്. എന്നാൽ തനിക്ക് ഇതുവരെ പുതിയ കരാർ വാഗ്ദാനം ചെയ്തിട്ടില്ലെന്നും തുടരാൻ താൽപര്യമുണ്ടോ എന്ന ക്ലബ് അധികൃതർ ചോദിക്കുക മാത്രമാണ് ചെയ്തതെന്നും അവസാന പത്രസമ്മേളനത്തിൽ കോൺസ്റ്റന്റൈൻ വ്യക്തമാക്കിയിരുന്നു. ഈ സാഹചര്യത്തിൽ കോൺസ്റ്റൈൻ പുറത്താകുമോയെന്നത് കാത്തിരുന്ന് കാണണം.
