SHARE

ലോകകപ്പ് കാണാനായി റഷ്യയിലേക്ക് പോകാനൊരുങ്ങിയ 1200-ലേറെ ആരാധകരെ ഇം​ഗ്ലണ്ട് വിലക്കി. ഫുട്ബോൾ മത്സരങ്ങളുമായി ബന്ധപ്പെട്ട അക്രമസംഭവങ്ങളിലും നിയമലംഘനങ്ങളിലും പങ്കാളികളായിട്ടുള്ളവരെയാണ് ഇം​ഗ്ലണ്ട് തടഞ്ഞുവെച്ചിരിക്കുന്നത്. ഇവരുടെ പാസ്പോർട്ടുകൾ പിടിച്ചെടുത്തു.

ഫ്രാൻസിൽ 2016-ൽ നടന്ന യൂറോക്കപ്പിനിടെ ഇം​ഗ്ലീഷ്-റഷ്യൻ ആരാധകസംഘങ്ങൾ ഏറ്റുമുട്ടിയത് വലിയ വിവാദമായിരുന്നു. ഇതിന്റെ തുടർച്ച റഷ്യയിൽ നടക്കുമെന്ന് റിപ്പോർട്ടുകളുണ്ടായിരുന്നു. ഈ സാഹചര്യത്തിൽ അക്രമങ്ങളുടെ പശ്ചാത്തലമുള്ള ആരാധകരെ ഒഴിവാക്കി, മാന്യരായ ആരാധകരെ മാത്രമെ ലോകകപ്പിന് അയക്കൂകയുള്ളുവെന്ന് ഇം​ഗ്ലണ്ട് തീരുമാനിച്ചിരുന്നു. ഇതിന്റെ തുടർച്ചയായുള്ള നടപടികളാണിത്.

1312 പേരോടാണ് പാസ്പോർട്ട് സമർപ്പിക്കാൻ അധികൃതർ നിർദേശിച്ചത്. ഇതിൽ 1254 പേർ പാസ്പോർട്ട് പോലീസിന് കൈമാറി. ബാക്കി ഉള്ളവരെ പിന്തുടരുകയാണെന്നാണ് പോലീസ് പറയുന്നത്. ഇതിന് പുറമേ, പ്രധാന ഇം​ഗ്ലീഷ് തുറമുഖങ്ങളിൽ പോലീസ് പരിശോധനയുണ്ടാകും. 10,000-ഓളം ഇം​ഗ്ലീഷുകാർ ലോകകപ്പ് കാണാൻ റഷ്യയിലെത്തുമെന്നാണ് റിപ്പോർട്ടുകൾ.