കഴിഞ്ഞ ഐ.എസ്.എൽ സീസണിൽ കേരളാ ബ്ലാസ്റ്റേഴ്സിന്റെ ക്യാപ്റ്റനായിരുന്നു സ്പാനിഷ് താരം സെർജി സി‍ഡോഞ്ച. പരുക്കിനെത്തുടർന്ന് സീസണിലെ ഭൂരിഭാഗം മത്സരങ്ങളും സിഡോയ്ക്ക് നഷ്ടമായി. എന്നാൽ അടുത്ത സീസണിൽ സിഡോ ബ്ലാസ്റ്റേഴ്സിൽ തിരിച്ചെത്താൻ സാധ്യതയുണ്ടെന്ന സൂചനകളാണ് പുറത്തുവരുന്നത്.
കഴിഞ്ഞ സീസണിലെ മൂന്നാം മത്സരത്തിലാണ് സിഡോയ്ക്ക് പരുക്കേറ്റത്. ലിഗമെന്റ് ഇഞ്ച്വറി നേരിട്ട താരം പിന്നീട് ക്ലബിനായി കളിച്ചില്ല. ഇതോടെ ഇടയ്ക്ക് സ്പാനിഷ് താരം തന്നെയായ ജുവാൻഡെ സിഡോയ്ക്ക് പകരക്കാരനായി എത്തി. എന്നാലിപ്പോൾ വരും സീസണിലേക്കുള്ള വിദേശസൈനിങ്ങുകൾ പരിഗണിക്കുന്ന ബ്ലാസ്റ്റേഴ്സിന്റെ റഡാറിൽ സിഡോയുമുണ്ട്. പ്രശസ്ത ജേർണലിസ്റ്റ് മാർക്കസ് മെർഹുലാവോയാണ് ഇക്കാര്യം ട്വീറ്റ് ചെയ്തത്.
സാഹചര്യം പരിഗണിക്കുമ്പോൾ സിഡോ ബ്ലാസ്റ്റേഴ്സിൽ തിരിച്ചെത്തിയാൽ താൻ അത്ഭുതപ്പെടില്ലെന്നും മാർക്കസ് ട്വീറ്റ് ചെയ്തു. അതേസമയം തന്നെ ബ്ലാസ്റ്റേഴ്സ് ഇതുവരെ സിഡോയ്ക്ക് മുന്നിൽ ഓഫർ ഒന്നും വച്ചിട്ടില്ലെന്നും അദ്ദേഹം വ്യക്തമാക്കി.
സ്പാനിഷ് മിഡ്ഫീൽഡറായ സിഡോ 2019-20 സീസണിലാണ് ബ്ലാസ്റ്റേഴ്സിലെത്തിയത്. ആ സീസണിൽ ബ്ലാസ്റ്റേഴ്സിനായി 13 മത്സരങ്ങളിലാണ് സിഡോ ബൂട്ടുകെട്ടിയത്. തുടർന്ന് മറ്റെല്ലാ വിദേശതാരങ്ങളേയും ബ്ലാസ്റ്റേഴ്സ് ഒഴിവാക്കിയെങ്കിലും സിഡോയെ നിലനിർത്തുകയായിരുന്നു.
