SHARE

ക്രിസ്റ്റ്യാനോ റൊണാൾഡോ, ലയണൽ മെസി എന്നിവരുടെ മേധാവിത്വം അവസാനിപ്പിച്ചതിന്റെ പേരിലാണ് 2018-ലെ ഫിഫ പുരസ്കാരം ചരിത്രത്തിലിടം നേടിയത്. എന്നാൽ‍ അതോടൊപ്പം തന്നെ വിമർശനങ്ങൾക്കും വിവാദങ്ങൾക്കും ഈ പുരസ്കാരനിശ അവസരമൊരുക്കി എന്നതാണ് യാഥാർഥ്യം

മികച്ച ​ഗോളിന് നൽകുന്ന പുഷ്കാസ് പുരസ്കാരം തന്നെയാണ് ഏറ്റവും വിവാദമാകുന്നത്. കഴിഞ്ഞ ഡിസംബറിൽ പ്രീമിയർ ലീ​ഗ് മത്സരത്തിൽ എവർട്ടനെതിരെ ലിവർപൂളിനായി മുഹമ്മദ് സാല നേടിയ ​ഗോളാണ് പുരസ്കാരത്തിനർഹമായത്. എന്നാൽ സാലയുടെ ​ഗോൾ പുരസ്കാരം നേടാൻ തക്ക മികച്ചതാണോ എന്ന് വലിയ വിഭാ​ഗം ആരാധകർ സമൂഹമാധ്യമങ്ങളിലൂടെ ചോദിക്കുന്നുണ്ട്.

ഇതിനവർ പറയുന്ന ഒരു കാരണം, ഇം​ഗ്ലീഷ് പ്രീമിയർ ലീ​ഗിൽ അന്ന് ​ഗോൾ ഓഫ് ദ മന്ത് പുരസ്കാരം നേടാൻ സാലയുടെ ഈ ​ഗോളിന് സാധിച്ചിരുന്നില്ല എന്നതാണ്. അതോടൊപ്പം നെതർലൻഡ് താരം ആര്യൻ റോബൻ വർഷങ്ങളായി ഇത്തരം ​ഗോളുകൾ അടിക്കുന്നുണ്ടെന്നും ആരാധകർ ട്വീറ്റ് ചെയ്യുന്നു.

ഫിഫ പ്രോ ഇലവനെ തിരഞ്ഞെടുത്തതാണ് മറ്റൊരു വിവാദം. ഫിഫയുടെ മികച്ച ​ഗോളി പുരസ്കാരം നേടിയ ബെൽജിയത്തിന്റെ തിബോ കോർട്ടോ പ്രോ ഇലവനിലില്ല. മാഞ്ചസ്റ്റർ യുണൈറ്റഡിൻെ സ്പാനിഷ് ​ഗോളി ഡേവിഡ് ഡി ​ഗിയയാണ് പകരമുൾപ്പെട്ടിരിക്കുന്നത്. അതോടൊപ്പം ലോകകപ്പ് കളിക്കാതിരുന്ന പി.എസ്.ജിയുടെ ബ്രസീൽ താരം ഡാനി ആൽവസ് എങ്ങനെ പ്രോ ഇലവനിൽ ഇടം നേടിയെന്നും ആരാധകരും ചോദിക്കുന്നുണ്ട്..