SHARE

അന്താരാഷ്ട്ര ഫുട്ബോളിലെ ഏറ്റവും ക്ലാസിക്ക് പോരാട്ടമാണ് ബ്രസീലും അർജന്റീനയും തമ്മിലുള്ളത്. എന്നാൽ ലോകകപ്പിലേക്ക് വരുമ്പോൾ ക്ലാസിക്ക് പോരാട്ടം എന്നവകാശപ്പെടാവുന്ന ഒരു മത്സരം കൂടിയുണ്ട്. ജർമനിയും അർജന്റീനയും തമ്മിലുള്ള മത്സരം.

കഴിഞ്ഞ മൂന്ന് ലോകപ്പുകളിലും അർജന്റീനയെ നാട്ടിലേക്ക് മടക്കിയയച്ചത് ജർമനിയാണ്. 2006-ലും 2010-ലും ക്വാർട്ടറിലും 2014-ൽ ഫൈനലിലുമാണ് ജർമനി അർജന്റീനയെ തകർത്തത്. 2006-ൽ ക്വാർട്ടറിൽ പെനാൽറ്റി ഷൂട്ടൗട്ടിലൂടയാണ് ജർമനി വിജയം നേടിയത്. അർജന്റീനയ്ക്കായി റോബർട്ടോ അയാളയും ജർമനിക്കായി മിറോസ്ലാവ് ക്ലോസെയും ​ഗോൾ നേടിയപ്പോഴാണ് മത്സരം ഷൂട്ടൗട്ടിലേക്ക് നീങ്ങിയത്. അവിടെ ജർമൻ താരങ്ങൾ കൃത്യമായി ലക്ഷ്യം കണ്ടപ്പോൾ ​ഗോൾസ്കോറർ അയാളയ്ക്കും എസ്തബാൻ കാംബിയോസയക്കും അർജന്റൈൻ നിരയിൽ പിഴച്ചത്.

2010 ദക്ഷിണാഫ്രിക്ക ലോകകപ്പിൽ ക്വാർട്ടറിൽ എതിരില്ലാത്ത നാല് ​ഗോളിനാണ് അർജന്റീനയെ ജർമനി തകർത്തത്. ബാസ്റ്റിൻ ഷ്വൈൻസ്റ്റീ​ഗറുടെ അസാധ്യ പ്രകടനം കണ്ട മത്സരത്തിൽ ക്ലോസെ(രണ്ട്), തോമസ് മുള്ളർ, ആർനെ ഫ്രെഡ്റിച്ച് എന്നിവരാണ് അർജന്റൈൻ വലകുലിക്കുയത്.
കഴിഞ്ഞ ബ്രസീൽ ലോകകപ്പിൽ അധികസമയത്ത് മാരി​ഗോ ​ഗോട്സെ സൂപ്പർ മാരിയോ ആയപ്പോൾ ജർമനി ലോകകിരീടവുമായി മടങ്ങി. ഒരിക്കൽ കൂടി അർജന്റീനയുടെ കണ്ണീര് വീഴ്ത്തി. ഇക്കുറിയും ഇരു ടീമുകളും ഏറ്റമുട്ടുമോയെന്ന് അറിയാനിരിക്കുന്നതേയുള്ളു. എന്നാൽ ഒരു കാര്യം ഉറപ്പാണ് ഏറ്റുമുട്ടിയാൽ അത് ഒരു ഒന്നൊന്നര മത്സരമായിരിക്കും.