മുൻ ഇന്ത്യൻ താരം മൻപ്രീത് ഗോണി എല്ലാത്തരം ക്രിക്കറ്റ് മത്സരങ്ങളിൽ നിന്നും വിരമിക്കൽ പ്രഖ്യാപിച്ചു. പഞ്ചാബ് താരമായ ഗോണി, കഴിഞ്ഞ ദിവസം പഞ്ചാബ് ക്രിക്കറ്റ് അസോസിയേഷന് അയച്ച കത്തിലാണ് തന്റെ വിരമിക്കൽ പ്രഖ്യാപനം അറിയിച്ചത്. ചെന്നൈ സൂപ്പർ കിംഗ്സിന് വേണ്ടി ഐപിഎൽ കളിച്ച് ശ്രദ്ധേയനായ ഗോണി 2008 ൽ നടന്ന ഏഷ്യാകപ്പിൽ ഇന്ത്യയ്ക്ക് വേണ്ടി രണ്ട് മത്സരങ്ങൾ കളിച്ചിട്ടുണ്ട്.
കഴിഞ്ഞ ദിവസം നടന്ന ഗ്ലോബൽ കാനഡ ടി20 ലീഗിന്റെ താര ഡ്രാഫ്റ്റിൽ ടോറൊന്റോ നാഷണൽസ് ടീം ഗോണിയെ സ്വന്തമാക്കിയിരുന്നു. ഇതിന് പിന്നാലെയാണ് താരത്തിന്റെ വിരമിക്കൽ പ്രഖ്യാപനമെത്തുന്നത്. ബിസിസിഐ യിൽ നിന്ന് അനുമതി ലഭിച്ചാൽ ഇക്കുറി ഗോണിയും കാനഡ ടി20 ലീഗിൽ കളിക്കും. ഉയരക്കാരൻ ബോളറായ ഗോണി, ആദ്യ സീസൺ ഇന്ത്യൻ പ്രീമിയർ ലീഗിൽ ചെന്നൈ സൂപ്പർ കിംഗ്സിന് വേണ്ടി ശ്രദ്ധേയ പ്രകടനമാണ് കാഴ്ച വെച്ചത്. ഈ പ്രകടനമാണ് അദ്ദേഹത്തെ ആദ്യമായി ഇന്ത്യൻ ടീമിലെത്തിച്ചത്.
2008 ലെ ഏഷ്യാകപ്പിനുള്ള ഇന്ത്യൻ ടീമിൽ ഇടം പിടിച്ച ഗോണി, ഹോങ്കോംഗിനും, ബംഗ്ലാദേശിനുമെതിരെയുള്ള മത്സരങ്ങളിൽ ആദ്യ ഇലവനിലുണ്ടായിരുന്നു. ഈ രണ്ട് മത്സരങ്ങളിൽ നിന്ന് 2 വിക്കറ്റുകളാണ് താരം വീഴ്ത്തിയത്. ഐപിഎല്ലിൽ ചെന്നൈ സൂപ്പർ കിംഗ്സിന് പുറമേ ഡെക്കാൺ ചാർജേഴ്സ്, കിംഗ്സ് ഇലവൻ പഞ്ചാബ്, ഗുജറാത്ത് ലയൺസ് ടീമുകളിലും താരം കളിച്ചിട്ടുണ്ട്. 44 ഐപിഎൽ മത്സരങ്ങളിൽ 37 വിക്കറ്റുകളാണ് ഗോണി വീഴ്ത്തിയിട്ടുള്ളത്.
