ഇന്ത്യൻ സൂപ്പർ ലീഗിൽ ഇന്നലെ നടന്ന പോരാട്ടത്തിൽ കേരളാ ബ്ലാസ്റ്റേഴ്സിന് അപ്രതീക്ഷിത തോൽവി നേരിടേണ്ടിവന്നു. കൊൽക്കത്തയിലെ സാൾട്ട് ലേക്ക് സ്റ്റേഡിയത്തിൽ നടന്ന പോരിൽ എതിരില്ലാത്ത ഒരു ഗോളിന് ഈസ്റ്റ് ബംഗാളാണ് ബ്ലാസ്റ്റേഴ്സിനെ വീഴ്ത്തിയത്. ഐഎസ്എൽ ചരിത്രത്തിൽ തന്നെ ബ്ലാസ്റ്റേഴ്സിനെതിരെ ഈസ്റ്റ് ബംഗാളിന്റെ ആദ്യ ജയമാണിത്.
മത്സരത്തിലെ തോൽവിക്ക് ശേഷം മാധ്യമങ്ങളോട് സംസാരിച്ച ബ്ലാസ്റ്റേഴ്സ് പരിശീലകൻ ഇവാൻ വുകോമനോവിച്ച് ഈസ്റ്റ് ബംഗാൾ ജയിക്കാൻ വേണ്ടി മാത്രമാണ് കളിച്ചതെന്ന് പറഞ്ഞു. മത്സരഫലത്തിൽ നിർണായകമായത് ഈസ്റ്റ് ബംഗാളിന്റെ പോരാട്ടവീര്യമായിരുന്നെന്നും ഇവാൻ കൂട്ടിച്ചേർത്തു.
ഞങ്ങളേക്കാൾ അധികം ഈ മത്സരത്തിൽ വിജയിക്കാൻ ആഗ്രഹിച്ചത് ഈസ്റ്റ് ബംഗാളാണ്, കളിയിൽ നിർണായകമായത് ഇക്കാര്യമാണ്, ഞങ്ങളുടെ ടീമിന് ഇത് തികച്ചും നിരാശപ്പെടുത്തുന്ന ഒരു ദിവസമായിരുന്നു, ഇത്തരത്തിലുള്ള ടീമുകളെ നേരിടുമ്പോൾ ഓരോ ഡ്യുവലുകളിലും പന്തിനായുള്ള പോരാട്ടങ്ങളിലും അവരോട് ഒപ്പം നിൽക്കാൻ കഴിയണം, എന്നാലെ പോയിന്റുകൾ നേടാനാകു, അക്കാര്യം വളരെ പ്രധാനപ്പെട്ടതാണ്, ഇവാൻ പറഞ്ഞു.
