SHARE

ഇം​ഗ്ലീഷ് പ്രീമിയർ ലീ​ഗിൽ കഴിഞ്ഞ ദിവസമാണ് യുക്രൈൻ വിങ്ങർ മിഖായലോ മുഡ്രിക്ക് അരങ്ങേറ്റം കുറിച്ചത്. വൻതുക മുടക്കി ചെൽസി സൈൻ ചെയ്ത ഈ 22-കാരൻ ആൻഫീൽഡിൽ നടന്ന പോരാട്ടത്തിൽ ലിവർപൂളിനെതിരെയാണ് ആദ്യമായി പ്രീമിയർ ലീ​ഗിൽ പന്ത് തട്ടിയത്.

55-ാം മിനിറ്റിൽ ലൂയിസ് ഹാളിന് പകരമായിറങ്ങിയ മുഡ്രിക്ക് അരമണിക്കൂറിൽ കൂടുതൽ മാത്രമെ കളിക്കളത്തിലുണ്ടായിരുന്നുള്ളു. ഇതിനിടയിൽ തന്നെ ചില കിടിലൻ മുന്നേറ്റങ്ങൾ നടത്തി മുഡ്രിക്ക് ചെൽസി ആരാധകരുടെ കൈയ്യടിയേറ്റുവാങ്ങി. എന്നാൽ ഇതിനുപുറമെ ഈ ചുരുങ്ങിയ സമയം ഈ സീസണിലെ പ്രീമിയർ ലീ​ഗിലെ വേ​ഗതയുടെ റെക്കോർഡും മുഡ്രിക്ക് സ്വന്തമാക്കി.

മത്സരത്തിനിടയിൽ മണിക്കൂറിൽ 36.63 കിലോമീറ്റർ വേ​ഗത മുഡ്രിക്ക് കൈവരിച്ചിരുന്നു. ഇതോടെയാണ് ഈ സീസണിലെ ഏറ്റവും വേ​ഗമേറിയ താരമായി മുഡ്രിക്ക് മാറിയത്. 36.61 കിലോമീറ്റർ വേ​ഗതയിൽ കുതിച്ച എവർട്ടന്റെ ആന്റണി ​ഗോർഡനെയാണ് മുഡ്രിക്ക് മറികടന്നത്. ലിവർപൂളിന്റെ യുറു​ഗ്വായൻ സ്ട്രൈക്കർ ഡാർവിൻ ന്യൂനസ്, മഞ്ചസ്റ്റർ സിറ്റിയുടെ നോർവീജിയൻ സ്ട്രൈക്കർ എർലിങ് ഹാലാൻഡ് എന്നിവരാണ് വേ​ഗതയുടെ കാര്യത്തിൽ തൊട്ടടുത്ത സ്ഥാനങ്ങളിൽ.