ഐഎസ്എൽ ക്ലബ് ബെംഗളുരു എഫ്സിയുടെ റിസർവ് ടീം പരിശീലകനായി ബിബിയാനോ ഫെർണാണ്ടസ് നിയമിതനായി. മൂന്ന് വർഷത്തെ കരാറിൽ ബിബിയാനോയെ നിയമിച്ച കാര്യം ക്ലബ് തന്നെ ഔദ്യോഗികമായി പ്രഖ്യാപിച്ചു.
46 കാരനായ ബിബിനായോ 2017 മുതൽ ഇന്ത്യയുടെ അണ്ടർ 17 ടീമിന്റെ ചുമതല വഹിക്കുകയായിരുന്നു. ബിബിയാനോയുടെ കീഴിൽ രണ്ട് തവണ ഇന്ത്യ അണ്ടർ 15 സാഫ് കപ്പിൽ ജേതാക്കളായി. 2018-ൽ അണ്ടർ 16 ഏഷ്യാ കപ്പിൽ ഇന്ത്യയെ ക്വാർട്ടർ ഫൈനൽ വരെയെത്തിക്കാനും ബിബിയാനോയ്ക്ക് കഴിഞ്ഞു. എന്നാലിപ്പോൾ ദേശീയ ടീം ദൗത്യം ഒഴിഞ്ഞിട്ടാണ് ബിബിയാനോ ബെംഗളുരുവിനൊപ്പം ചേർന്നത്.
15 വർഷത്തിലേറെ നീണ്ട പ്രൊഫഷനൽ പ്ലേയിങ് കരിയറിൽ പല വൻ ക്ലബുകളുടേയും ജേഴ്സിയണിഞ്ഞിട്ടുണ്ട് ബിബിയാനോ. മിഡ്ഫീൽഡറായിരുന്ന ബിബിയാനോ, ചർച്ചിൽ ബ്രദേഴ്സ്, ഡെംപോ ഗോവ, ഈസ്റ്റ് ബംഗാൾ തുടങ്ങിയ ക്ലബുകളെയാണ് പ്രതിനിധീകരിച്ചത്.
