SHARE

യൂറോപ്പിൽ ഇന്നലെ നടന്ന ഫുട്ബോൾ പോരാട്ടങ്ങളിൽ സ്പാനിഷ് സൂപ്പർ ക്ലബ് റയൽ മഡ്രിഡ്, ഇം​ഗ്ലീഷ് ക്ലബ് എവർട്ടൻ, ജർമൻ ക്ലബ് റെഡ്ബുൾ ലെയ്പസി​ഗ് തുടങ്ങിയവർക്ക് ജയം. മഡ്രിഡ് ഡെർബിയിൽ അത്ലെറ്റിക്കോ മഡ്രിഡിനെയാണ് റയൽ തകർത്തത്. പ്രീമിയർ ലീ​ഗിൽ ചെൽസിയെയാണ് എവർട്ടൻ അട്ടിമിറിച്ചത്.

റയലിന്റെ മൈതാനത്ത് നടന്ന ഡെർബി പോരാട്ടത്തിൽ എതിരില്ലാത്ത രണ്ട് ​ഗോളിനായിരുന്നു ആതിഥേയരുടെ ജയം. റയലിനായി ബ്രസീലിയൻ താരം കാസിമെറോ ​ഗോൾ നേടി. അത്ലെറ്റിക്കോ ​ഗോളി ജാൻ ഒബ്ലാക്കിന്റെ സെൽഫ് ​ഗോളും റയൽ അക്കൗണ്ടിലേക്ക് വന്നു. ഈ ലാ ലി​ഗ സീസണിൽ അത്ലെറ്റിക്കോ മഡ്രിഡിന്റെ ആദ്യ തോൽവി കൂടിയാണ്

പ്രീമിയർ ലീ​ഗിൽ എതിരില്ലാത്ത ഒരു ​ഗോളിനാണ് എവർട്ടൻ ചെൽസിയെ വീഴ്ത്തിയത്. 22-ാം മിനിറ്റിൽ പെനാൽറ്റി കിക്ക് വലയിലെത്തിച്ച് ​ഗിൽഫി സി​ഗുർസനാണ് എവർട്ടന് വിജയം സമ്മാനിച്ചത്.

ബുന്ദസ്‌ലി​ഗയിൽ എതിരില്ലാത്ത് രണ്ട് ​ഗോളിന് വെർഡർ ബ്രെമനെയാണ് ലെയ്പ്സി​ഗ് വീഴ്ത്തിയത്. മാർസെൽ സാബിറ്റ്സർ, ഡാനി ഓൾമോ എന്നിവർ ലെയ്പ്സി​ഗിനായി വലകുലുക്കി. മറ്റൊരു മത്സരത്തിൽ ബയേൺ മ്യൂണിച്ച്, യൂണിയൻ ബെർലിനോട് സമനില വഴങ്ങി. ഇരുടീമുകളും ഓരോ ​ഗോൾ വീതം നേടി. അതേസമയം തന്നെ ബൊറൂസിയ ഡോർട്ട്മുണ്ട് സ്റ്റുട്ട്​ഗർട്ടിനോട് ഒന്നിനെതിരെ അഞ്ച് ​ഗോളുകൾക്ക് തോറ്റു.