ഇന്ത്യൻ പ്രീമിയർ ലീഗ് പോരാട്ടങ്ങൾ ഇന്ന് തുടങ്ങാനിരിക്കെ മലയാളി താരം സന്ദീപ് വാര്യരെ ടീമിലെത്തിച്ച് മുംബൈ ഇന്ത്യൻസ്. പരുക്കിനെത്തുടർന്ന് ഐപിഎൽ നഷ്ടമാകുന്ന സ്റ്റാർ പേസർ ജസ്പ്രീത് ബുംറയ്ക്ക് പകരമാണ് സന്ദീപിനെ മുംബൈ ഒപ്പം കൂട്ടുന്നത്.
31-കാരനായ സന്ദീപിന്റെ മൂന്നാം ഐപിഎൽ ടീമാണ് മുംബൈ. റോയൽ ചാലഞ്ചേഴ്സ് ബെംഗളുരുവിലൂടെയാണ് സന്ദീപ് ഐപിഎൽ അരങ്ങേറ്റം കുറിച്ചത്. പിന്നീട് കൊൽക്കത്ത നൈറ്റ് റൈഡേഴ്സിന്റേയും ഭാഗമായിരുന്നു സന്ദീപ്. വലങ്കൈയ്യൻ പേസറായ സന്ദീപ് ആഭ്യന്തര ക്രിക്കറ്റിൽ ആദ്യം കേരളത്തിനായാണ് കളിച്ചത്. എന്നാൽ രണ്ട് വർഷമായി തമിഴ്നാടിനെയാണ് സന്ദീപ് പ്രതിനിധീകരിക്കുന്നത്.
ഐപിഎൽ നഷ്ടമാകുന്ന സൂപ്പർ താരം റിഷഭ് പന്തിന് പകരമായി അഭിഷേക് പോരലിനെയാണ് ഡെൽഹി ക്യാപിറ്റൽസ് ടീമിലെത്തിച്ചത്. ബംഗാൾ സ്വദേശിയായ അഭിഷേക് വിക്കറ്റ് കീപ്പർ -ബാറ്ററാണ്. 20 വയസ് മാത്രം പ്രായമുള്ള അഭിഷേക്, അഭ്യന്തര ക്രിക്കറ്റിൽ 20-ഓളം മത്സരങ്ങളാണ് കളിച്ചിട്ടുള്ളത്.
