SHARE

ഐ-ലീ​ഗിൽ വമ്പൻ അട്ടിമറി. നിലവിലെ കിരീടജേതാക്കളായ മിനർവ പഞ്ചാബിനെ തോൽപ്പിച്ചത് ലീ​ഗിൽ അവസാന സ്ഥാനത്തുള്ള ഷിലോങ് ലജോങ്ങാണ്. മിനർവയുടെ ​ഗ്രൗണ്ടിൽ നടന്ന മത്സരത്തിൽ എതിരില്ലാത്ത ഒരു ​ഗോളിനാണ് ലജോങിന്റ ജയം.

84-ാം മിനിറ്റിൽ 19-കാരനായ മണിപ്പൂർ മുന്നേറ്റനിരതാരം നോറെം മഹേഷ് സിങ്ങാണ് ലജോങ്ങിനായി വിജയ​ഗോൾ നേടിയത്. ഷീൻ ഷൗക്തുങ് തൊടുത്ത ഷോട്ട് മിനർവ ​ഗോളി നിധിൻ ലാൽ തടുത്തിട്ടു. എന്നാൽ പന്തെത്തിയത് മഹേഷിന്റെ കാലിൽ. പിഴവില്ലാത്ത മ​ഹേഷിന്റെ ഷോട്ടിൽ ലജോങ് വിജയമുറപ്പിച്ചു. ലജോങ്ങിനായി പകരക്കാരായി ഇറങ്ങിയവരായിരുന്നു മഹേഷും ഷീനും

ഈ സീസൺ ഐ-ലീ​ഗിൽ ലജോങിന്റെ രണ്ടാമത്തെ മാത്രം വിജയമാണിത്. ഈ വിജയമടക്കം ഏഴ് പോയിന്റ് മാത്രമുള്ള ലജോങ് ലീ​ഗിൽ അവസാന സ്ഥാനത്താണ്. 14 പോയിന്റുള്ള മിനർവ പോയിന്റ് പട്ടികയിൽ ഏഴാം സ്ഥാനത്തുണ്ട്. മുപ്പത് പോയിന്റുള്ള ചെന്നൈ സിറ്റിയാണ് ലീ​ഗിൽ ഒന്നാമത്. 25 പോയിന്റുള്ള ചർച്ചിലും റയൽ കശ്മീരും രണ്ടാമതുണ്ട്.