SHARE

ലോകകപ്പിന് മുന്നോടിയായുള്ള സന്നാഹമത്സരത്തിൽ സ്പെയിന് ജയം. അതേസമയം തന്നെ ലോകകപ്പിൽ കിരീടപ്രതീക്ഷയുമായെത്തുന്ന ഫ്രാൻസ് അമേരിക്കയോട് സമനില വഴങ്ങി.

റഷ്യയിൽ നടന്ന മത്സരത്തിൽ ടൂണിഷ്യക്കെതിരെ എതിരില്ലാത്ത ഒരു ​ഗോളിനായിരുന്നു സ്പാനിഷ് പടയുടെ ജയം. 84-ാം മിനിറ്റിൽ ഇയാ​ഗോ ആസ്പാസായിരുന്നു സ്പെയിനിനായി വിജയ​ഗോൾ നേടിയത്. മത്സരത്തിൽ തോറ്റെങ്കിലും മികച്ച പ്രകടനമാണ് ടുണീഷ്യ നടത്തിയത്. ഇത് ലോകകപ്പിന് ഒരുങ്ങുന്ന മറ്റ് രാജ്യങ്ങൾക്ക് ഭീഷണിയായണ്.

സ്വന്തം നാട്ടിൽ നടന്ന മത്സരത്തിലായിരുന്നു ഫ്രാൻസ് അമേരിക്കയോട് സമനില വഴങ്ങിയത്. ഇരുടീമുകളും ഓരോ ​ഗോൾ വീതം നേടി. മത്സരത്തിന്റെ 44-ാം മിനിറ്റിൽ ജൂലിയൻ ​ഗ്രീനിലൂടെ അമേരിക്കയാണ് ആദ്യം മുന്നിലെത്തിയത്. എന്നാൽ 78-ാം മിനിറ്റിൽ പി.എസ്.ജിയുടെ കൗമാരതാരം കെയ്ലിന് എംബാപെ ഫ്രാൻസിനായി സമനില ​ഗോൾ നേടി.

ഇന്ന് നടക്കുന്ന സന്നാഹമത്സരത്തിൽ ബ്രസീൽ ഓസ്ട്രിയയെ നേരിടും. ഓസ്ട്രിയയിലെ വിയന്നയിലാണ് മത്സരം നടക്കുന്നത്. ഇന്ത്യൻ സമയം രാത്രി 7.30-നാണ് മത്സരം. അവസാനം നടന്ന മത്സരത്തിൽ ക്രൊയേഷ്യയെ തകർത്തതിന്റെ ആവേശത്തിലാണ് ബ്രസീൽ. ഓസ്ട്രിയയാകട്ടെ ജർമനിയെ അട്ടിമറിച്ചതിന്റെ ആത്മവിശ്വാസത്തിലും.